ইণ্টাৰনেশ্যনেল ডেস্ক, ৪ নৱেম্বৰ: শুকুৰবাৰে মাজ নিশা নেপালত অহা ৬.৪ প্ৰাবল্যৰ বৃহৎ ভূমিকম্পৰ ফলত কমেও ১২৮ গৰাকী লোকৰ মৃত্যু হোৱাৰ তথ্য পোৱা গৈছে । তাৰোপৰি এশৰো অধিক লোক আহত হোৱাৰ খবৰ আহিছে । বৰ্তমান দেশখনত পূৰ্ণগতিত অব্যাহত আছে সাহায্য আৰু উদ্ধাৰ অভিযান । দেশখনত হোৱা এই প্ৰাকৃতিক দুৰ্যোগক লৈ শোক প্ৰকাশ কৰিছে নেপালৰ প্ৰধানমন্ত্ৰীগৰাকীয়ে । মন কৰিবলগীয়া যে, উত্তৰ ভাৰতৰ ৰাজ্যসমূহতো অনুভূত হৈছিল এই ভূমিকম্পৰ জোকাৰণি।
ইফালে দেশখনৰ প্ৰশাসনৰ ফালৰ পৰা জনোৱা মতে, ৬.৪ প্ৰাবল্যৰ বৃহৎ ভূমিকম্পটোৰ ফলত নেপালৰ বহুকেইখন জিলা সম্পূৰ্ণৰূপে ধ্বংসস্তপলৈ পৰিণত হৈছে । এই প্ৰাকৃতিক দুৰ্যোগত বহু অট্টালিকাও ভাঙি ধ্বংসস্তুপলৈ পৰিণত হয় । লগতে মৃতকৰ সংখ্যা আৰু বৃদ্ধি পোৱাৰ সম্ভাৱনা আছে বুলিও দেশখনৰ প্ৰশাসনৰ ফালৰ পৰা প্ৰকাশ পাইছে ।
শুকুৰবাৰে মাজনিশাৰ ঠিক আগে আগে উত্তৰ-পশ্চিম নেপালৰ জিলাসমূহত প্রবল ভূমিকম্পটোৰ জোকাৰণি অনুভূত হৈছিল ৷ প্ৰশাসনিক বিষয়াসকলে জনোৱা মতে, এই ভূমিকম্পত কমেও ১২৮ গৰাকী লোক নিহত হোৱাৰ লগতে বহু সংখ্যক লোক আহত হৈছে । সাহায্য আৰু উদ্ধাৰ কৰ্মীৰ দলে পাহাৰীয়া গাঁৱসমূহত অভিযান আৰম্ভ অব্যাহত ৰাখিছে । শনিবাৰে পুৱা দেশখনৰ এগৰাকী প্ৰশাসনিক বিষয়াই উল্লেখ কৰা অনুসৰি, বহু ঠাইৰে সংযোগ বিচ্চিন্ন হৈ পৰাৰ ফলত মৃতকৰ সংখ্যা আৰু বৃদ্ধি পোৱাৰ সম্ভাৱনা আছে ।
এই দুৰ্যোগৰ পাছতে নেপালৰ প্ৰধানমন্ত্ৰী পুষ্প কমল দাহালে ভূমিকম্পত ক্ষতিগ্ৰস্ত অঞ্চলসমূহলৈ ৰাওনা হয় । নেপালৰ এগৰাকী প্ৰশাসনিক বিষয়াই জনোৱা মতে, ভেৰী চিকিৎসালয়, কোহলপুৰ চিকিৎসা মহাবিদ্যালয়, নেপালগঞ্জ সামৰিক চিকিৎসালয় আৰু আৰক্ষী চিকিৎসালয়ক ভূমিকম্পত আক্ৰান্ত লোকসকলক চিকিৎসা প্ৰদান কৰি থকা হৈছে । একেধৰনে দেশখনৰ ক্ষতিগ্ৰস্ত অঞ্চলসমূৰ পৰা আহতসকলক উদ্ধাৰ কৰিবৰ বাবে সকলো হেলি-অপাৰেটৰক ষ্টেণ্ডবাইত থাকিবৰ বাবেও কোৱা হৈছে । লগতে নেপালগঞ্জ বিমানবন্দৰ আৰু সামৰিক বেৰেক হেলিপেডত বিমান এম্বুলেন্স নিয়োগ কৰি ৰখাৰ বাবেও নিৰ্দেশনা দিয়া হৈছে ।
মাজনিশাৰ ঠিক পূৰ্বে অহা এই ভূমিকম্পৰ সময়ত অধিকাংশ লোকেই ঘৰত নিদ্ৰামগ্ন অৱস্থাত আছিল । ভূমিকম্পটোৰ তীব্ৰতা ইমানেই বেছি আছিল যে ৮০০ কিলোমিটাৰ নিলগৰ ভাৰতৰ ৰাজধানী নতুন দিল্লীতো ইয়াৰ কম্পন অনুভৱ কৰা হৈছিল । দিল্লী, উত্তৰ প্ৰদেশ, বিহাৰ আদি অঞ্চলত ভূমিকম্পৰ এই কম্পন অনুভূত হৈছিল । কিন্তু ভাৰতত হোৱা এই ভূমিকম্পৰ ফলত কোনো ধৰণৰ প্ৰাণনাশ বা সা-সম্পত্তিৰ ক্ষতি হোৱাৰ খবৰ পোৱা নাই । ভূমিকম্পটোৰ পিছতে দিল্লী, লক্ষ্ণৌ, পাটনা আদি স্থানৰ ৰাজপথত আতংকিত অৱস্থাত লোকসকলক দেখা গ’ল ।
আমেৰিকাৰ ভূতাত্ত্বিক জৰীপে জনোৱা মতে, ভূমিকম্পটোৰ প্ৰাৰম্ভিক প্ৰাবল্য আছিল ৫.৬ । ভূপৃষ্ঠৰ পৰা ১১ মাইল গভীৰতাৰ পৰা আহিছিল এই ভূমিকম্পটো । নেপালৰ ৰাষ্ট্ৰীয় ভূমিকম্প নিৰীক্ষণ আৰু গৱেষণা কেন্দ্ৰই জনোৱা মতে, ইয়াৰ কেন্দ্ৰবিন্দু নেপালৰ ৰাজধানী কাঠমাণ্ডুৰ পৰা প্ৰায় ২৫০ মাইল উত্তৰ-পূবত অৱস্থিত জাজাৰকোটত। নিশা ১১.৩৫ বজাত অনুভূত হৈছিল ভূমিকম্পটোৰ জোকাৰণি ।
লগতে পঢ়ক: Earthquake hits Nepal: নেপালত 6.4 প্ৰাবল্যৰ ভূমিকম্প; আহত বহু লোক
(MoJo India – সূক্ষ্ম, শুদ্ধ আৰু বিশ্বাসযোগ্যতাৰ বাবে । সামাজিক মাধ্যমত আমাৰ X (Twitter), Facebook, YouTube, Threads তথা Instagram ৰ পেজকেইটা অনুসৰণ কৰক ।)
